ശ്രീനാരായണായ / ഗുരു വിശേഷാല്‍പതിപ്പ് ചുറ്റിപ്പിണയുന്ന സത്യത്തിന്റെ നാനാവര്‍ണങ്ങള്‍
അത് എന്തുകൊണ്ട് സഹസ്രാബ്ദത്തിന്റെ സ്വതന്ത്രദര്‍ശനമായിക്കൂടാ? ഭാരതത്തിന്റെ പൗരാണിക മതങ്ങളില്‍ വിശ്വസിച്ചാലും ഇല്ലെങ്കിലും ഗുരുമതത്തില്‍ നിലയുറപ്പിക്കാമെന്ന് ലോകത്തോട് വിളിച്ചുപറയേണ്ടിയിരിക്കുന്നു.

സീനിയര്‍ പത്രപ്രവര്‍ത്തകനായ ദിനകര്‍ ആര്‍. ശ്രാവണ്‍ എഴുതിയ കുറിപ്പ് കുറേ ചോദ്യങ്ങള്‍ ഉള്‍ക്കൊള്ളുന്നതാണ്. 1. എന്തുകൊണ്ട് ഗുരു ശിവപാര്‍വ്വതി, സുബ്രഹ്മണ്യാദികള്‍ക്ക് സ്തുതി എഴുതി? 2. ഗുരുവില്‍ ദ്വൈതചിന്ത ഉണ്ടായിരുന്നു; അതുകൊണ്ടല്ലേ ജാതി, മതം തുടങ്ങിയ വിഷയങ്ങള്‍ ഒരു സമസ്യയായി ഉയര്‍ത്തിക്കൊണ്ടുവന്നത്? 3. ജാതിരഹിതസമുദായം ഉണ്ടാകില്ലെന്നറിഞ്ഞ ഗുരു എന്തിനാണ് ഒരു ജാതി എന്ന സിദ്ധാന്തം അവതരിപ്പിച്ചത്?

ദിനകറിന്റെ ചോദ്യങ്ങള്‍ക്കുള്ള ഉത്തരം, ഈ പതിപ്പിന് സംഭാവന ചെയ്യാന്‍ കഴിയുമെന്നാണ് ഞങ്ങളുടെ വിശ്വാസം. ജാതിരഹിത സമുദായം ഉണ്ടാകില്ല എന്ന് ഗുരു ചിന്തിച്ചിട്ടില്ല. ഗുരുവിന്റെ ചിന്തകള്‍ മനസ്സിലാക്കുന്നവര്‍ ജാതിരഹിതരായിതീരും. ഹിന്ദുദൈവങ്ങളോട് എന്നല്ല, ഒരു മതത്തിലെയും ദൈവങ്ങളോട് ഗുരുവിന് എതിരഭിപ്രായമുണ്ടാവേണ്ട കാര്യമില്ല. ഗുരുവിന്റെദൈവത്തെ പ്രത്യേകം പഠിക്കണം. അത് മനുഷ്യവ്യക്തിയുടെ ചിന്തയുടെ അവസാനത്തെ തലത്തിലാണുള്ളത്.

വര്‍ഷങ്ങള്‍ക്കുമുമ്പ് ഗുരുവിന്റെ ക്ഷേത്രപ്രതിഷ്ഠകള്‍ നടക്കുന്ന അവസരത്തില്‍ ഒരു പത്രലേഖകന്‍ ഇതിനെപ്പറ്റി ചോദിച്ചത് ഓര്‍ക്കുകയാണ്. പലപ്പോഴായി ഗുരുവിനെ കണ്ട് സംസാരിച്ചതിന്റെ ഒരു റിപ്പോര്‍ട്ട് പിന്നീട് പ്രസിദ്ധീകരിക്കുകയായിരുന്നു. അതില്‍ നിന്ന് ഒരു ഭാഗം ഇവിടെ ചേര്‍ക്കുകയാണ്:

ലേഖകന്‍: അങ്ങ് എന്തിനാണ് ഇത്രയും പ്രതിഷ്ഠകള്‍ നടത്തിയത്?

ഗുരു: അബ്രാഹ്മണരെന്ന് കരുതുന്നവര്‍ ആരെങ്കിലുമുണ്ടെങ്കില്‍, അവര്‍ ദൈവത്തിന്റെ മുമ്പില്‍ തുല്യരാണെന്ന ബോധമുണര്‍ത്താന്‍. ലേഖകന്‍: അത് വിജയിച്ചുവോ?

ഗുരു: ആരാധന സ്വാതന്ത്ര്യമാണ്, ദൈവത്തിന്റെ മണ്ഡലത്തിലുള്ള ആന്തരിക സ്വാതന്ത്ര്യം. അത് ലഭിച്ചു.

ലേഖകന്‍: എന്താണ് അറിവ്?

ഗുരു: നാം അറിവാണ്, നാം അറിയുന്ന താങ്കള്‍ എന്ന വ്യക്തി അറിവാണ്. എന്നാല്‍ ഇതുരണ്ടും ഒന്നാണ്.

ലേഖകന്‍: എന്താണ് ഭക്തി?

ഗുരു: അത് ഏതൊന്നിന്റെയും കേന്ദ്രമായ സത്തയെ പിന്തുടരുന്ന പ്രക്രിയയാണ്. ആത്മാവ് എന്നത് എല്ലാറ്റിലുമുള്ള ആ ആദിമസത്തയാണ്.

ലേഖകന്‍: അകവും പുറവും തിങ്ങും മഹിമാവാര്‍ന്ന നിന്‍പദം എന്നതിന്റെ അര്‍ത്ഥമെന്താണ്?

ഗുരു: പ്രപഞ്ചത്തിനുള്ളില്‍ അനേകം വസ്തുക്കളുണ്ട്. അവ തന്നെ പല ഘടനകളോട് കൂടിയതാണ്. സൂക്ഷ്മജീവികള്‍, അദൃശ്യജീവികള്‍ എല്ലാമുള്ള ലോകം. പ്രപഞ്ചത്തിനുവെളിയിലും വേറെ പ്രപഞ്ചങ്ങള്‍ ഉണ്ടല്ലോ? ലേഖകന്‍: ഈ ലോകത്ത് സന്യാസത്തിന്റെ പ്രാധാന്യം എന്താണ്?

ഗുരു: സന്യാസിമാരില്ലെങ്കില്‍, ലോകം മരിച്ചെന്നാണ് അര്‍ത്ഥം.

ലേഖകന്‍: ആരാണ് ബ്രാഹ്മണന്‍?

ഗുരു: എല്ലാ പ്രാണികളിലും ജീവികളിലും ഒരേപോലെയുള്ള കൃപചൊരിയുന്നവന്‍.

ലേഖകന്‍: ഏതാണ് ഏറ്റവും നല്ല പ്രാര്‍ത്ഥന?

ഗുരു: ഒരു തെറ്റും ചെയ്യാന്‍ ഉള്ളില്‍ ചിന്തയുണ്ടാകരുത്.

ഗുരുസാഹിത്യത്തിന്റെയും ഗുരുജീവിതത്തിന്റെയും നേര്‍ക്കുള്ള സമര്‍പ്പിതമായ മനസ്സാണ് ഇവിടെ സമാഹരിക്കുന്ന സൃഷ്ടികളിലുള്ളത്. വളരെ ആശ്വാസം തോന്നിയത് എല്ലാവരും തന്നെ കല്പിതാംശത്തെയും യാഥാര്‍ത്ഥ്യത്തെയും കൂട്ടിയിണക്കി സര്‍ഗപരമായ നൂതനത്വം പുറത്തെടുത്തു എന്നതാണ്. ഈ സാഹിത്യകാരന്മാര്‍ ഗുരു ജീവിച്ച കാലഘട്ടത്തിലെ അറിയപ്പെടാത്തവരെയാണ് ഉപജീവിച്ചിട്ടുള്ളത്. പലരും ചരിത്രത്തിലില്ല. എത്രയോ പേരുമായി ഗുരു ആശയവിനിമയം ചെയ്തിട്ടുണ്ട്. അതെല്ലാം രേഖപ്പെടുത്തിയ പല കടലാസുകളും നഷ്ടപ്പെട്ടുപോയിട്ടുണ്ട്. ഗുരുവിന്റെ ജീവിതത്തെ യഥാതഥമായി എഴുതുന്നതിലല്ല, ദര്‍ശനപരമായ സമഗ്രത കൈവരിക്കുന്നതിനാണ് ഈ പതിപ്പ് ശ്രമിക്കുന്നത്. ഗുരുവിന്റെ ഭാഷണങ്ങള്‍, കൃതികള്‍ എന്നിവയിലൂടെ ആ ദര്‍ശനത്തിന്റെ സ്വകീയത വീണ്ടെടുക്കുകയാണിവിടെ. ഗുരുവിന്റെ പ്രഭാമയമായ കര്‍മമകാണ്ഡത്തെ അതുല്യമാക്കുന്നതാണ് അരുവിപ്പുറം പ്രതിഷ്ഠ. അതിനെപ്പറ്റി കുമാരനാശാന്‍ എഴുതിയിട്ടുള്ളത് ഇങ്ങനെയാണ്:

നദിയുടെ കിഴക്കേ തീരത്തുള്ള ഒരു പാറയെ പീഠമായി സങ്കല്പിച്ച് അതിന്മേല്‍ ഏതാണ്ട് ഒരു ശിവലിംഗാകൃതിയില്‍ ആറ്റില്‍ കിടന്ന ഒരു ശിലാഖണ്ഡം എടുത്ത് ശിവരാത്രി ദിവസം പ്രതിഷ്ഠ നടത്താനാണ് സ്വാമിയുടെ ഭാവം എന്നറിയുകയും അടുത്തുള്ള ജനങ്ങള്‍ തങ്ങളാല്‍ കഴിയുന്ന ചില ചെറിയ ഒരുക്കങ്ങള്‍ അതിനായി ചെയ്യുകയും ചെയ്തു. സ്വാമി ഇരിക്കുന്നതായറിഞ്ഞ് ഏതാനും വ്രതക്കാരും ഭജനക്കാരും ശിവരാത്രിനാള്‍ രാത്രി 'ഉറക്കിളയ്ക്കാ'നായി അവിടെ കൂടി. പ്രതിഷ്ഠയുടെ സംഭാരമായി ഉണ്ടായിരുന്നത് കുറെ പുഷ്പങ്ങളും നാദസ്വരവായനയും മാത്രമായിരുന്നു. പീഠമായി സങ്കല്പിച്ചിരുന്ന പാറയുടെ മീതെ ഒരു ചെറിയ പന്തല്‍ കെട്ടിയിരുന്നു.