ഗുരു വിശേഷാല്‍പതിപ്പ് ചുറ്റിപ്പിണയുന്ന സത്യത്തിന്റെ നാനാവര്‍ണങ്ങള്‍

ശ്രീനാരായണഗുരുവിനെക്കുറിച്ച് 'വിവേകചൂഡാമണി' ഒരു പ്രത്യേക പതിപ്പ് പ്രസിദ്ധീകരിക്കുകയാണ്. ചരിത്രത്തിന്റെ മദം, മത്സരം, എന്നീ ദോഷങ്ങള്‍, ഗുരു സൂചിപ്പിച്ചതുപോലെ, ഇന്നും ശക്തമാണ്. അഭിമാന കൊലപാതകങ്ങളും ദലിത് ബലാത്സംഗങ്ങളും നമ്മെ കാടന്മാരാക്കിക്കൊണ്ടിരിക്കുന്നു. ബുദ്ധിതന്നെ വിഭാഗീയതയ്ക്ക് വേണ്ടി പണിയെടുക്കുന്നു. ഉണര്‍വിന്റെ മൂല്യങ്ങള്‍ പോലും ചൂഷണത്തിനുവേണ്ടി ഉപയോഗിക്കുന്നു. നിശ്ശബ്ദത പാലിക്കുക, സത്യം പറയുക, സാഹോദര്യത്തോടെ പെരുമാറുക, എല്ലാറ്റിലും സൗന്ദര്യമുണ്ട് തുടങ്ങിയ നല്ല തത്ത്വങ്ങള്‍പോലും ഇന്ന് പതിതനെ വീണ്ടും ചവിട്ടുന്നതിനായി ഉപയോഗിക്കുകയാണ്. സാംസ്കാരികമായ ആത്മീയത എന്ന ആശയം ഇനിയെങ്കിലും നാം പഠിപ്പിക്കേണ്ടിയിരിക്കുന്നു. ക്രൂരതയ്ക്ക് ഒരവധി കൊടുക്കാം. ഗുരുവിന്റെ അനുകമ്പയും മനുഷ്യത്വവുമെല്ലാം തിരിച്ചുവരേണ്ട സമയമായി.

ഞങ്ങളുടെ പതിപ്പ് ഗുരുവിനെ പലരീതിയില്‍ വായിക്കുകയാണ്. വിവിധ തലങ്ങളില്‍ നിന്നുള്ള രചനകളാണിതില്‍ സമാഹരിക്കുന്നത്. ഓരോരുത്തര്‍ക്കും അവരവരുടെ സമീപനങ്ങളുണ്ട്. എഡിറ്ററെന്ന നിലയില്‍ എന്റെ ജോലി ഈ പതിപ്പ് പൂര്‍ണ വിജയമാക്കുകയാണ്. ഗുരുവിന്റെ ജീവചരിത്രം അതേപടി കഥയാക്കാന്‍ ഞങ്ങള്‍ ആരോടും ആവശ്യപ്പെട്ടിട്ടില്ല. അത് വളരെ യാന്ത്രികമാവുമെന്ന് ആര്‍ക്കാണറിഞ്ഞുകൂടാത്തത്? ഞങ്ങള്‍ തിരഞ്ഞെടുത്ത പതിനഞ്ച് എഴുത്തുകാര്‍ക്ക് അയച്ച കത്തിലെ പ്രധാനവാക്യങ്ങള്‍ ഇങ്ങനെയാണ്:

ഞങ്ങള്‍ ശ്രീനാരായണഗുരുവിനെക്കുറിച്ച് പുറത്തിറക്കുന്ന പ്രത്യേക പതിപ്പിലേക്ക് താങ്കളുടെ സ്വതന്ത്രധിഷണയുടെ ഒരു രചന അയച്ചുതരണം. അത് ലേഖനമോ, കവിതയോ, കഥയോ, ആസ്വാദനമോ, ഗുരുവിന്റെ ദര്‍ശനങ്ങളുടെ വ്യാഖ്യാനമോ, നോവലോ എന്തുമാകാം. അത് സ്വന്തം വീക്ഷണത്തിന്റെ പ്രത്യേകതകൊണ്ട് ഒറ്റപ്പെട്ട് നില്‍ക്കണം. എഴുതുന്നതിനു മുന്‍പ് ഒരു കാര്യമേ ഓര്‍മ്മിപ്പിക്കാനുള്ളൂ. ഗുരുവിന് സ്വന്തമായ ഒരു പ്രപഞ്ചവീക്ഷണമുണ്ട്; മതസങ്കല്പമുണ്ട്; ലൗകികചിന്തകളുണ്ട്, ആത്മീയമാര്‍ഗങ്ങളുണ്ട്. ആ ഗുരുവിനെയാണ് തേടേണ്ടത്. മുന്‍പ് പലരും പറഞ്ഞു പഴകിയ കാര്യങ്ങള്‍ നമ്മുടെ വായനക്കാര്‍ക്ക് ചൊടിപ്പുണ്ടാക്കുമെന്ന് പ്രത്യേകം പറയേണ്ടതില്ലല്ലോ.

ഈ കത്തിനോട് പ്രതികരിച്ചുകൊണ്ട് 15 പേരും മറുപടി എഴുതി. നിശ്ചിത സമയപരിധിക്കുള്ളില്‍ തന്നെ തങ്ങള്‍ ഈ ദൗത്യം സമ്പൂര്‍ണ്ണമാക്കുമെന്ന് ആഹ്ലാദത്തോടെ എല്ലാവരും അറിയിച്ചു. നാലുമാസത്തെ സമയമാണ് നല്‍കിയിരുന്നത്. ഓരോ എഴുത്തുകാരനും അവരവരുടെ രീതിയില്‍ ഗുരുവിനെ കണ്ടെത്തുകയാണ് ചെയ്തത്. ചരിത്രത്തിന്റെ ഭാഗമായ ഗുരുവിന്റെ ദര്‍ശനങ്ങളാണ് എല്ലാവരെയും പ്രചോദിപ്പിച്ചതെന്നത് അഭിമാനത്തോടെ ഇവിടെ എഴുതുകയാണ്.

ഈ പതിപ്പില്‍ അണിനിരക്കുന്നത് പ്രശസ്തരായ കെ.വി.എസ്. പുത്രന്‍(പകല്‍ സൂര്യരഥങ്ങള്‍ ദൂരേക്ക്; പ്രതീതിയുടെ പൂക്കളും), ആനന്ദന്‍ തിരുമുല്‍പ്പാട് (ആത്മീയമായ നിരാഹാരം; ഏകാന്തതയുടെ ആയിരം അടരുകള്‍), സി. ഹേലി (മരക്കൂട്ടത്തിന്റെ കറുപ്പും ആകാശത്തെപ്പറ്റിയുള്ള ദിവ്യവിശേഷങ്ങളും), വില്യം ചെങ്ങന്നൂര്‍(താമരയുടെ ഇതളുകള്‍ ഏതോ സത്യത്തിനു കാവല്‍ നില്‍ക്കുന്നു), എന്‍.എ. ബഷീര്‍(നിര്‍മ്മിച്ച ശില്പങ്ങള്‍ക്ക് പിറകില്‍ അദൃശ്യശില്പങ്ങള്‍ വേറെയും), കെ.എസ്. ഫിലിപ്പോസ്(സര്‍വ്വമതങ്ങളിലും വിശ്വസിക്കുന്ന സത്യാന്വേഷികളായ ദൈവങ്ങള്‍), സി. രാമവര്‍മ്മ ഭക്തന്‍ തമ്പുരാന്‍(ഒരറിവ് സ്വയം നിരസിച്ച് മറ്റൊന്നായി സ്വയം നിര്‍മ്മിക്കുന്നു), എം.പി. നാഗരികന്‍(കടല്‍ അതിന്റെ സൗന്ദര്യത്തെ മായയിലും സ്പഷ്ടമാക്കുന്നു), എം. പത്മനാഭന്‍(രസപ്പെയ്ത്തുമായി മായയുടെ സഹസ്രദലങ്ങള്‍), ടി.എസ്. കോട്ടുകോയിക്കല്‍(ആകാശത്തെ ലക്ഷ്യമാക്കി ആ മരങ്ങള്‍ തഴച്ചുവളരുകയാണ്), ആര്‍.വി. ചെന്താമരാക്ഷന്‍(നിഷ്കാമമായ ആത്മനിവേദനം അംബരാന്തങ്ങളിലേക്ക്), കെ.പി. പത്രോസ്(വസ്തുവിന്റെയുള്ളിലെ അറിവാകുന്ന സര്‍പ്പം), എന്‍.എച്ച്. നരേന്ദ്രവര്‍മ്മ(ഞാനുണ്ടായിരുന്നു; അതേസമയം ഞാന്‍ മാത്രമല്ലായിരുന്നു), മാവേലിക്കര ലളിതാംബിക(കാറ്റിനു ഭേദചിന്തയില്ല; അത് ശിവമായി നമുക്കിടയിലൂടെ ഒഴുകുന്നു), പിറവം ഇ. ഭാസ്ക്കരമേനോന്‍(ശൂന്യമായ പാത്രങ്ങളില്‍ നമ്മെത്തന്നെ നിറയ്ക്കാം) തുടങ്ങിയവരാണ്.