ശ്രീനാരായണഗുരുവിന്റെ വചനങ്ങളുടെ പൊരുളില്‍ നിന്ന് സര്‍ഗാത്മകമായ സ്വതന്ത്രാവിഷ്കാരത്തിലേക്കാണ് എന്റെ വായനയും ചിന്തയും ഈ കൃതിയില്‍ സഞ്ചരിച്ചിട്ടുള്ളത്. ഗുരുവിന്റെ ജീവചരിത്രം വെറുതെ കഥയാക്കുന്നതില്‍ സാഹിത്യപരമായ വെല്ലുവിളി ഞാന്‍ കണ്ടില്ല; മറിച്ച് അതിന്റെ കലാപരമായ അവതരണമാണ് ലക്ഷ്യംവച്ചത്. ദാര്‍ശനികവും കലാപരവുമായി ഗുരുവാക്യങ്ങളെ സമീപിക്കുന്നത് അങ്ങനെയാണ്. സമകാലീനവും നവീനവുമായ ക്രാഫ്റ്റ് അതിനാവശ്യ മായിരുന്നു. അതുകൊണ്ടാണ് നോവലിന് ഒരു 'ഓഥര്‍' എന്ന സങ്കല്പത്തെ മറികടന്ന് പതിനഞ്ച് എഴുത്തുകാരെ ഇവിടെ സമ്മേളിപ്പിച്ചിട്ടുള്ളത്. ഒരു മാസിക പുറത്തിറക്കുന്ന ഗുരുദര്‍ശന പതിപ്പ് എന്ന നിലയില്‍ ഈ നോവല്‍ വിഭാവനം ചെയ്തിരിക്കുന്നു. ഗുരുവിനെ എങ്ങനെയെല്ലാം വായിക്കാം എന്നതാണ് ലക്ഷ്യം. പതിനഞ്ച് എഴുത്തുകാര്‍ ഈ പതിപ്പില്‍ അവരുടെ സ്വന്തമായ ഗുരു അനുഭവം വിവരിക്കുന്നു. ഈ പതിനഞ്ച് രചയിതാക്കളും പതിപ്പ് പ്രസിദ്ധീകരിക്കുന്ന മാസികയും സാങ്കല്പികമാണ്. ഇതില്‍ പരാമര്‍ശിക്കപ്പെടുന്ന മറ്റ് എഴുത്തുകാരും അവരുടെ കൃതികളും ഭാവനാധിഷ്ഠിതമാണ്. ഗുരുചിന്ത മാത്രമാണ് ഇവിടെ അന്വേഷണ വിഷയം. അതാകട്ടെ എന്നിലെ എഴുത്തുകാരന്റെ ആത്മാനുഭവത്തിലൂടെയാണ് രൂപഭാവം ആര്‍ജിക്കുന്നത്. ഗുരുവിന്റെ ചിന്താമണ്ഡലത്തെ സ്വാധീനിച്ചിരുന്ന വിവിധ ഘടകങ്ങള്‍, പരിവര്‍ത്തനോന്മുഖമായ ഒരു കാലഘട്ടത്തെ എങ്ങനെ ആന്തരികമായി ദൃഢപ്പെടുത്തുന്നു എന്നത് പ്രധാനവിഷയമായിരുന്നു. നോവല്‍ എന്ന 'ഗുരുസ്പെഷ്യലി'ല്‍ പങ്കുചേരുന്ന എഴുത്തുകാര്‍ അവരുടെ ഗുരുവിനെ തേടുകയാണ്. അതിനായി അവര്‍ ഭൂതകാലത്തോടും ഭാവിയോടും കലഹിക്കുന്നു. പ്രാണതത്ത്വങ്ങള്‍ക്ക് വേണ്ടി സ്വയം യാതന അനുഭവിക്കുന്ന തലം വരെ ചിലര്‍ എത്തുന്നു. ദൈവചിന്തയെ വെറും ഗണിതമോ യുക്തി ശാസ്ത്രമോ ആയി വെട്ടിച്ചുരുക്കുന്നവരുണ്ട്. ഇതിനു ബദലായി ഇവിടെ സമ്പൂര്‍ണ മായ വൈയക്തിക, വൈകാരിക വീക്ഷണസമര്‍പ്പണമാണ് ഉണ്ടാകുന്നത്. ഓരോ വ്യക്തിയും ഗുരുവിനെ എത്രത്തോളം അറിയുന്നു എന്നതും ചിന്താപ്രശ്നമായിരുന്നു. നിരാസ്പദമായ ആദ്ധ്യാത്മിക സത്യാന്വേഷണം. ഗുരുധര്‍മ്മത്തെ വീണ്ടും വീണ്ടും അന്വേഷിച്ചുകൊണ്ടിരിക്ക ണമെന്ന വിനീതമായ അഭ്യര്‍ത്ഥനയോടെ ഈ പുസ്തകം ഞാന്‍ സമര്‍പ്പിക്കുന്നു.

- എം.കെ.ഹരികുമാര്‍