2. എരിയുന്ന ഭവനം

പഴകി ജീർണ്ണിച്ച മുറിയിൽ കട്ടിലിലേക്ക് ദൃശ്യം കേന്ദ്രീകരിക്കുന്നു.

ദ്രവിച്ച ഭിത്തിയിൽ ചാരി വെച്ചിരിക്കുന്ന ഒരു ഊന്നുവടി കാണാം. മേശയിൽ പകുതിയോളം വെള്ളമുള്ള ഗ്ലാസ്. കടിച്ചു പാതിയാക്കിയ ആപ്പിൾ. ട്രേയിൽ സിറിഞ്ച്. പഞ്ഞി. പുറത്ത് ട്രെയിൻ പോകുന്ന ഇരമ്പം ഉയർന്നു. വിറയ്ക്കുന്ന ടീപ്പോയിൽ ഗ്ലാസ് താനേ ചലിക്കുവാൻ തുടങ്ങി. അത് ട്രേയ്ക്ക് സമീപം നിശ്ചലമായി.

സ്റ്റോക്കറുടെ ഭാര്യ ഒരു വശത്തേക്ക് ചരിഞ്ഞു കിടക്കുകയാണ്. കണ്ണുകൾ വ്യസനത്തോടെ തുറന്നിരിക്കുന്നു. ശാലീന യുവത്വത്തിൽ പ്രാരബ്ധതയുടെ ഭാരം മുഖത്തു നിഴലിക്കുന്നു. അവൾ ഏതോ വിഷാദ ചിന്തയിലാണ്.



നടുവിൽ മകൾ മാർത്ത ഉറങ്ങുകയാണ്. അവളെ നോക്കി തൊട്ടടുത്ത് ചരിഞ്ഞുകിടപ്പുണ്ട് സ്റ്റോക്കർ. കടുത്ത ചിന്തയുടെ വിജനതയിലാണ് അയാൾ. മൊട്ടയടിച്ച തലയിൽ മുടി പൊടിച്ചിട്ടുണ്ട്. ഒരു സ്ഥിരം കുറ്റവാളിയുടേതുപോലുള്ള ബാഹ്യപ്രകൃതം.

നേരം പുലർന്നിട്ടില്ല. സ്റ്റോക്കർ നിവർന്നിരുന്നു. മകളെ തലോടിയ ശേഷം അരണ്ടവെളിച്ചത്തിൽ മെല്ലെ എഴുന്നേറ്റു. കട്ടിൽപടിയിൽ തൂക്കിയിട്ടിരുന്ന വാച്ച് പതുക്കെ എടുത്തു. ട്രൗസർ വലിച്ചുകേറ്റി ബെൽറ്റ് മുറുക്കി. കാലിൽ ഷൂസ് ധരിച്ചു. മെല്ലെ നടന്നു വാതിൽ ചാരി അടുത്ത മുറിയിലേക്ക് കടന്നു. എന്നാൽ ഭാര്യ വാതിൽ വിടവിലൂടെ അയാളെ കാണുന്നുണ്ട്.