1. ഉൽപ്പത്തി >
പുതിയ മനുഷ്യലോകം എന്നത് സ്വപ്നമാണെങ്കിൽ കൂടി ആത്മവിശ്വാസം നഷ്ടപ്പെട്ടാൽ ആർക്കാണ് അതിനെ കുറിച്ച് എഴുതാനാവുക എന്ന് സാഹിത്യകാരൻ വ്യാകുലപ്പെടുന്നുണ്ട്. എന്നാൽ തനിക്കു ചുറ്റുമുള്ള ലോകത്തെ മാറ്റിമറിക്കാമെന്നു ചിന്തിച്ചവർ അതേ ലോകത്താൽ അടിമയാക്കപ്പെടുന്നുവെന്ന് ശാസ്ത്രജ്ഞൻ ഈർഷ്യപ്പെടുന്നു. അതോടൊപ്പം രൂപപ്പെടുന്ന വാഗ്ദാനങ്ങളും കല്പനകളും തകർക്കപ്പെടണമെന്നും ആഗ്രഹിക്കുന്നു. പ്രത്യാശ സഫലമാവുന്ന ഇടം സ്വർഗീയമാണെന്ന് സ്റ്റോക്കറും വിശ്വസിക്കുന്നു. വൈരുധ്യങ്ങളുടെ സംശ്ലേഷണം.

ഈ കലാസൃഷ്ടിയിലെ ഓരോ നിമിഷവും സ്വാതന്ത്ര്യം അനുഭവിക്കുന്നു. വിശ്വചലച്ചിത്രകലയുടെ സർഗ്ഗ സങ്കേതത്തെ പ്രകാശിപ്പിക്കുന്ന സിനിമയാണ് സ്റ്റോക്കർ. റോഡ് പിക്നിക് എന്ന നോവലിനെ ആസ്പദമാക്കി സൃഷ്ടിച്ച അഭ്രലോകം.



ബ്ലാക് ആൻഡ് വൈറ്റ് ഛായയിൽ പഴയൊരു ബാറിൽ നിന്നാണ് തുടക്കം. അതിരാവിലെ ബാറുടമ വാതിൽ തുറന്ന് ലൈറ്റിടുന്നു. ഭൗതിക ശാസ്ത്രജ്ഞനായ പ്രൊഫസർ അവിടേയ്ക്കു ചെന്ന് കാപ്പി വാങ്ങിക്കുടിച്ചു. അയാൾ ആരെയോ പുറത്തുനിന്നു പ്രതീക്ഷിക്കുന്നുണ്ട്. മുഖം കുനിച്ചു ചിന്തയിലാണ്ടു. ആഗ്രഹങ്ങൾ സഫലീകരിക്കുന്ന ആ ദുരൂഹ മേഖലയിലേക്ക് പോയ ആരും തന്നെ തിരിച്ചെത്തിയിട്ടില്ല. തിരിച്ചെത്തിയ മുൻഗാമിയാവട്ടെ ജീവിതം അവസാനിപ്പിക്കുകയും ചെയ്തു. ആ മേഖലയിലേക്കുള്ള യാത്ര വിലക്കപ്പെട്ടിരിക്കുന്നു… എങ്കിലും യാഥാർഥ്യ രൂപത്തിലും പ്രതിഭാസ രൂപത്തിലും അറിയപ്പെടുന്നതിന്റെ പരമാർത്ഥം സത്യാന്വേഷികളാണല്ലോ അന്വേഷിക്കുന്നത്. **** ****